தமிழக அரசியலில் பரபரப்பை ஏற்படுத்தும் வகையில், ஆளுநர் ராஜேந்திர விஸ்வநாத் அர்லேகரை அமமுக பொதுச்செயலாளர் டிடிவி தினகரன் நேற்று (ஆகஸ்ட் 25) நேரில் சந்தித்து மனு அளித்துள்ளார்.தமிழக வெற்றிக் கழக அரசு தொடர்பான சில முக்கிய புகார்கள் குறித்து ஆளுநர் தலையிட்டு நடவடிக்கை எடுக்க வேண்டும் என டிடிவி தினகரன் கோரிக்கை விடுத்துள்ளார்.

ஆளுநரிடம் முன்வைத்த 3 முக்கிய புகார்கள் ஆளுநரை சந்தித்த பிறகு பேசிய டிடிவி தினகரன், மூன்று முக்கிய விவகாரங்கள் தொடர்பாக மனு அளித்ததாக தெரிவித்தார்.

தவெக அரசு அமைந்த பின்னணியில் குதிரை பேரம் நடைபெற்றதாக முன்வைக்கப்படும் குற்றச்சாட்டுகள் குறித்து உரிய விசாரணை நடத்த வேண்டும் என அவர் கோரிக்கை விடுத்துள்ளார்.

மன்னார்குடி சட்டமன்ற உறுப்பினர் காமராஜ் மீது 10-வது அட்டவணையின் கீழ் தாக்கல் செய்யப்பட்டுள்ள தகுதி நீக்க மனு மீது தமிழக சட்டப்பேரவைத் தலைவர் உரிய நடவடிக்கை எடுக்கவில்லை என்றும் தினகரன் குற்றம்சாட்டியுள்ளார்.

சட்டப்பேரவைத் தேர்தலில் மன்னார்குடி தொகுதியில் அமமுக சார்பில் போட்டியிட்ட காமராஜ் வெற்றி பெற்றார்.ஆனால், தேர்தல் முடிவுகளுக்குப் பிறகு பெரும்பான்மை இல்லாத நிலையில் ஆட்சி அமைத்த தவெகவுக்கு காமராஜ் ஆதரவு தெரிவித்தார். இதையடுத்து அவர் அமமுகவில் இருந்து நீக்கப்பட்டார்.தொடர்ந்து, காமராஜை சட்டமன்ற உறுப்பினர் பதவியில் இருந்து தகுதி நீக்கம் செய்ய வேண்டும் என டிடிவி தினகரன், சபாநாயகர் ஜே.சி.டி. பிரபாகரிடம் மனு அளித்தார்.அதேபோல், காமராஜ் தவெகவுக்கு ஆதரவு தெரிவித்ததன் பின்னணியில் “குதிரை பேரம்” நடைபெற்றதா? என்பது குறித்தும் விசாரணை நடத்த வேண்டும் என தினகரன் தொடர்ந்து வலியுறுத்தி வருகிறார்.

இந்த நிலையில், நேரடியாக ஆளுநர் அர்லேகரை சந்தித்து மனு அளித்திருப்பது தமிழக அரசியல் வட்டாரத்தில் கவனம் பெற்றுள்ளது.குதிரை பேரம் குறித்த புகார், எம்எல்ஏ தகுதி நீக்க விவகாரம், காவல்துறை நடவடிக்கை இல்லாதது என அடுத்தடுத்து மூன்று விவகாரங்களை முன்வைத்து ஆளுநரிடம் டிடிவி தினகரன் முறையிட்டுள்ளதால், இந்த விவகாரங்களில் அடுத்தகட்டமாக என்ன நடவடிக்கை எடுக்கப்படும் என்ற எதிர்பார்ப்பு எழுந்துள்ளது.