மூன்று துறைகளில் ஊழல் மற்றும் முறைகேடுகள் தொடர்பான ஆதாரங்களுடன் கூடிய கோப்புகள் தனது மேசையில் இருப்பதாக முதலமைச்சர் விஜய் சட்டப்பேரவையில் தெரிவித்த நிலையில், அந்தக் கோப்புகள் மீது உடனடி நடவடிக்கை எடுக்காமல் இருப்பது ஏன்? என புதிய தமிழகம் கட்சித் தலைவர் டாக்டர் கிருஷ்ணசாமி கேள்வி எழுப்பியுள்ளார்.இதுதொடர்பாக அவர் வெளியிட்டுள்ள எக்ஸ் பதிவில், முதலமைச்சர் மற்றும் அமைச்சர்கள் பதவியேற்கும்போது எடுக்கும் ‘ரகசியக் காப்பு’ உறுதிமொழியை சுட்டிக்காட்டியுள்ளார்.

அரசியலமைப்புச் சட்டத்தின்படி முதலமைச்சர் மற்றும் அமைச்சர்கள் பதவியேற்கும்போது நாட்டின் இறையாண்மையை காப்பது உள்ளிட்ட உறுதிமொழிகளுடன், அரசு நிர்வாகம் தொடர்பான அதிமுக்கிய ரகசியங்களை வெளியில் கசியவிடாமல் பாதுகாப்பதாகவும் உறுதியேற்கின்றனர் என கிருஷ்ணசாமி குறிப்பிட்டுள்ளார்.ஆனால், கடந்த ஆகஸ்ட் 19-ஆம் தேதி சட்டப்பேரவையில் பேசிய முதலமைச்சர் விஜய், மூன்று துறைகளின் கோப்புகள் ஆதாரங்களுடன் தனது மேசையில் இருப்பதாக தெரிவித்ததாக அவர் சுட்டிக்காட்டியுள்ளார்.மேலும், “எதை எப்போது திறக்க வேண்டுமோ, அப்போது திறக்கப்படும்” என முதலமைச்சர் கூறியிருப்பதாகவும் கிருஷ்ணசாமி குறிப்பிட்டுள்ளார்.

ஊழல் மற்றும் முறைகேடுகள் தொடர்பாக ஆதாரங்களுடன் கோப்புகள் இருப்பதாக முதலமைச்சரே கூறியுள்ள நிலையில், அவற்றின் மீது உடனடியாக வழக்குப்பதிவு செய்து சட்டப்படி நடவடிக்கை எடுக்காமல் இருப்பது ஏன் என அவர் கேள்வி எழுப்பியுள்ளார்.“அத்தகைய முக்கியத்துவம் வாய்ந்த கோப்புகளை தனது மேசையிலேயே வைத்திருப்பது எதற்காக?” என்றும் அவர் கேள்வி எழுப்பியுள்ளார்.மேலும், இந்த விவகாரங்களை முன்கூட்டியே பொதுவெளியில் அறிவிப்பதால், குற்றச்சாட்டுக்கு உள்ளானவர்கள் உஷாராகி ஆதாரங்களை அழிக்கவோ அல்லது சட்ட நடவடிக்கையிலிருந்து தப்பிக்கவோ வாய்ப்பு ஏற்படாதா என்றும் கிருஷ்ணசாமி தெரிவித்துள்ளார்.

முதலமைச்சர் ஊழல் தொடர்பான கோப்புகள் இருப்பதாக சட்டப்பேரவையிலேயே வெளிப்படையாக பேசிவிட்டு, நடவடிக்கையைத் தாமதிப்பது அரசியல் வட்டாரத்திலும் மக்கள் மத்தியிலும் சந்தேகங்களை ஏற்படுத்துவதாகவும் அவர் கூறியுள்ளார்.மேலும், “முன்கூட்டியே விவகாரங்களைப் பொதுவெளியில் பேசிவிட்டு, நடவடிக்கையை நிலுவையில் வைப்பது தவறான முன்னுதாரணமாக மாறாதா?” எனவும் கேள்வி எழுப்பியுள்ளார்.இதனால், முதலமைச்சர் விஜய் குறிப்பிட்டதாக கூறப்படும் அந்த மூன்று துறைகளின் கோப்புகள் என்ன? அவற்றில் இடம்பெற்றுள்ள குற்றச்சாட்டுகள் என்ன? எப்போது நடவடிக்கை எடுக்கப்படும்? என்ற கேள்விகள் தற்போது அரசியல் வட்டாரத்தில் மீண்டும் எழுந்துள்ளன.