தமிழக சட்டப்பேரவையில் முதலமைச்சர் விஜய் வெளியிட்டுள்ள ஒரு அறிவிப்பு தற்போது அரசியல் வட்டாரத்திலும் பொதுமக்கள் மத்தியிலும் விவாதத்தை ஏற்படுத்தியுள்ளது. மாநிலத்தின் 240 சட்டமன்ற உறுப்பினர்கள் மற்றும் முக்கிய சட்டப்பேரவைப் பொறுப்புகளில் இருப்பவர்களுக்கு புதிய கார்கள் வழங்கப்படும் என்ற அறிவிப்புதான் இதற்கு காரணம். அதோடு கார் மட்டுமல்லாமல், ஓட்டுநர், ஓட்டுநருக்கான ஊதியம், தினசரிப்படி, பெட்ரோல் அல்லது மின்சாரச் செலவு, வாகனப் பராமரிப்பு உள்ளிட்ட செலவுகளையும் அரசு ஏற்கும் என தெரிவிக்கப்பட்டுள்ளது. இந்த அறிவிப்பு ஆளும் தரப்பில் வரவேற்பைப் பெற்றுள்ள நிலையில், அரசின் நிதிநிலை, மக்கள் பணம் பயன்படுத்தப்படும் விதம், ஏற்கெனவே எம்.எல்.ஏ.க்களுக்கு வழங்கப்படும் பயணச் சலுகைகள் உள்ளிட்ட பல கேள்விகளும் எழுந்துள்ளன.

“எம்.எல்.ஏ.க்களுக்கு கார் கொடுக்கப் போகிறாரா முதல்வர் விஜய்?” சட்டப்பேரவையில் இந்த அறிவிப்பு வெளியானபோது, தமிழக வெற்றிக் கழகத்தின் சட்டமன்ற உறுப்பினர் கே. சிந்து, பிரபலமான பழைய திரைப்படப் பாடல் வரல் வரிகளை மாற்றிப் பாடி முதலமைச்சர் விஜய்யை பாராட்டினார். “கொடுத்ததெல்லாம் கொடுத்தார்… அவர் யாருக்காகக் கொடுத்தார்… ஒருத்தருக்கா கொடுத்தார்… இல்லை ஊருக்காகக் கொடுத்தார்…” என பாடல் வரிகளை மாற்றிப் பாடியதாக கூறப்படுகிறது. எம்.எல்.ஏ.க்கள் தொகுதிக்குள் மட்டுமல்லாமல், பல்வேறு பகுதிகளுக்கு சென்று பொதுமக்களின் பிரச்சினைகளை நேரடியாக ஆய்வு செய்ய வேண்டியிருப்பதால் வாகன வசதி அவசியம் என ஆளும் தரப்பில் கூறப்படுகிறது.

கார் மட்டுமல்ல… ஓட்டுநரும், செலவுகளும்! அரசின் அறிவிப்பின்படி, புதிய வாகனம் வழங்கப்படுவதுடன் அதனை இயக்குவதற்கான ஓட்டுநர், அவருக்கான ஊதியம் மற்றும் தினசரிப்படி உள்ளிட்ட செலவுகளும் கவனத்தில் கொள்ளப்பட உள்ளன. மேலும், வாகனத்திற்கு தேவையான பெட்ரோல் அல்லது மின்சாரச் செலவு மற்றும் பராமரிப்புச் செலவுகளும் அரசின் பொறுப்பில் வர உள்ளன. இதனால், இது ஒரு முறை மட்டும் செய்யப்படும் கார் கொள்முதல் செலவு மட்டுமல்லாமல், தொடர்ந்து ஆண்டுதோறும் அரசுக்கு ஏற்படும் செலவாகவும் மாறுகிறது.

எம்.எல்.ஏ.க்களுக்கு ஏற்கெனவே என்னென்ன சலுகைகள் உள்ளன? தமிழகத்தில் சட்டமன்ற உறுப்பினர்களுக்கு ஏற்கெனவே பல்வேறு பயணச் சலுகைகள் நடைமுறையில் உள்ளன. அரசுப் போக்குவரத்துக் கழகங்களின் பேருந்துகளில் இலவசமாகப் பயணம் செய்யும் வசதி, ரயில் பயணத்திற்கான சலுகைகள், அலுவல் சார்ந்த பயணங்களுக்கு பயணப்படி, குறிப்பிட்ட அளவிலான எரிபொருள் செலவு உள்ளிட்ட பல்வேறு வசதிகள் வழங்கப்படுகின்றன. மேலும், சட்டப்பேரவைக் கூட்டத்தொடர் மற்றும் சட்டமன்றக் குழுக்களின் ஆய்வுப் பணிகளுக்காக மேற்கொள்ளப்படும் பயணங்களுக்கும் விதிமுறைகளின்படி பயணப்படி மற்றும் தினசரிப்படி வழங்கப்படுகிறது. இதனால், “ஏற்கெனவே பல்வேறு பயணச் சலுகைகள் இருக்கும் நிலையில், புதிதாக ஒவ்வொரு உறுப்பினருக்கும் அரசு சார்பில் கார் வழங்க வேண்டிய அவசியம் என்ன?” என்ற கேள்வியும் எழுந்துள்ளது.

240 பேருக்கு கார் என்றால் எவ்வளவு செலவு? இந்த அறிவிப்பின் மிகப்பெரிய விவாதப் புள்ளி இதுதான். சட்டப்பேரவை உறுப்பினர்கள், நியமன உறுப்பினர்கள் மற்றும் பேரவைத் தலைவர், துணைத்தலைவர், பேரவைச் செயலர் உள்ளிட்ட முக்கியப் பொறுப்புகளில் இருப்பவர்கள் என மொத்தம் சுமார் 240 பேருக்கான வாகன வசதி குறித்து கணக்குகள் முன்வைக்கப்படுகின்றன. ஒரு காரின் விலை சுமார் ரூ.15 லட்சம் முதல் ரூ.20 லட்சம் வரை எனக் கணக்கிட்டால், 240 வாகனங்களுக்கு மட்டும் சுமார் ரூ.36 கோடி முதல் ரூ.48 கோடி வரை செலவாகலாம். இதற்கு மேலாக ஓட்டுநர் ஊதியம், எரிபொருள், பராமரிப்பு மற்றும் பிற செலவுகள் ஆண்டுதோறும் தொடரும். இதனால், முதல் ஆண்டில் மட்டும் பல பத்துக்கணக்கான கோடி ரூபாய் செலவாகும் வாய்ப்பு இருப்பதாக விமர்சனங்கள் எழுந்துள்ளன.

“அரசின் நிதிநிலை ஏற்கெனவே சிரமத்தில் இல்லையா?” தமிழக அரசின் நிதிநிலை குறித்து ஆளும் தரப்பும் எதிர்க்கட்சிகளும் தொடர்ந்து விவாதித்து வரும் நிலையில், இத்தகைய புதிய செலவு தேவையா என்ற கேள்வி எழுப்பப்படுகிறது. மாணவர்களுக்கான மடிக்கணினி, சைக்கிள், ஊட்டச்சத்து உள்ளிட்ட மக்கள் நலத்திட்டங்களுக்கு அரசு நிதி ஒதுக்க வேண்டிய நிலையில், மக்கள் பிரதிநிதிகளுக்கான வசதிகளுக்காக கூடுதல் செலவு செய்வது சரியான முன்னுரிமையா? என்ற விவாதமும் தொடங்கியுள்ளது.

“என்னிடம் ஏற்கெனவே கார் இருக்கிறது… எனக்கு வேண்டாம்” என்று யாராவது சொல்வார்களா? இந்த அறிவிப்பில் மற்றொரு சுவாரஸ்யமான கேள்வியும் முன்வைக்கப்படுகிறது. தற்போதைய சட்டமன்ற உறுப்பினர்களில் பலருக்கு ஏற்கெனவே சொந்த வாகனங்கள் இருப்பதாக அவர்களது தேர்தல் வேட்புமனு ஆவணங்களில் குறிப்பிடப்பட்டுள்ள நிலையில், “ஏற்கெனவே சொந்தக் கார் வைத்திருக்கும் எம்.எல்.ஏ.க்கள் அரசு வழங்கும் புதிய காரை வேண்டாம் என்று மறுப்பார்களா?” என்ற கேள்வி எழுகிறது. அப்படி யாராவது தாமாக முன்வந்து அரசு காரைத் தேவையில்லை என்று கூறினால், அது மக்கள் மத்தியில் வேறு விதமான அரசியல் செய்தியையும் உருவாக்கும்.

ஐந்து ஆண்டுகள் முடிந்த பிறகு கார் யாருடையது? மற்றொரு முக்கியமான கேள்வி இதுதான். ஒரு சட்டமன்ற உறுப்பினரின் பதவிக்காலம் முடிந்த பிறகு, அந்த அரசு கார் திரும்பப் பெறப்படுமா? அடுத்த தேர்தலில் அதே நபர் மீண்டும் வெற்றி பெற்றால், அவருக்கு மீண்டும் புதிய கார் வழங்கப்படுமா? அப்படி வழங்கப்பட்டால், ஒவ்வொரு சட்டமன்றத்திற்கும் புதிய வாகனங்களை வாங்கும் நடைமுறை உருவாகுமா? அதேபோல், ஒரு உறுப்பினர் தேர்தலில் தோல்வியடைந்தால், அவரிடம் இருந்த வாகனத்தை உடனடியாக அரசு திரும்பப் பெறுமா என்ற கேள்வியும் எழுகிறது.

ஓட்டுநர்களின் நிலை என்ன? கார் வழங்கப்படுவதுடன் ஓட்டுநர்களும் நியமிக்கப்படுவார்கள் எனில், அவர்களின் பணிநிலை குறித்த கேள்விகளும் இயல்பாக எழுகின்றன. ஒரு சட்டமன்ற உறுப்பினர் பதவிக்காலம் முடிந்தால், அவருடன் பணியாற்றிய ஓட்டுநர் அடுத்த உறுப்பினருக்கு மாற்றப்படுவாரா? அல்லது புதிய உறுப்பினருக்கு புதிய ஓட்டுநர் நியமிக்கப்படுவாரா? இந்த நடைமுறைகள் அனைத்தும் தெளிவாக வரையறுக்கப்பட வேண்டிய அவசியம் உள்ளது.

110-வது விதியின் கீழ் அறிவிப்பு ஏன்? இந்த அறிவிப்பு சட்டப்பேரவையில் விதி 110-ன் கீழ் வெளியிடப்பட்டிருப்பதும் அரசியல் விவாதத்திற்கு காரணமாகியுள்ளது. விதி 110-ன் கீழ் முதலமைச்சர் அல்லது அமைச்சர் முக்கியமான அரசுப் பொது விவகாரங்கள் தொடர்பாக அறிக்கை வெளியிட முடியும். ஆனால் அந்த அறிக்கையின் மீது வழக்கமான விவாதம் அல்லது வாக்கெடுப்பு நடைபெறாது. இதனால், “இத்தனை கோடி ரூபாய் செலவு ஏற்படுத்தக்கூடிய அறிவிப்பை ஏன் இந்த விதியின் கீழ் வெளியிட வேண்டும்?” என்ற கேள்வி எழுப்பப்படுகிறது.

உலகிலேயே இது புதிய முயற்சியா? சட்டமன்ற உறுப்பினர்களுக்கு பயண வசதிகள், எரிபொருள் செலவு, பயணப்படி போன்ற சலுகைகள் பல இடங்களில் நடைமுறையில் இருந்தாலும், ஒவ்வொரு சட்டமன்ற உறுப்பினருக்கும் அரசு சார்பில் புதிய கார் வழங்கும் திட்டம் குறித்து ஒப்பீடுகள் முன்வைக்கப்பட்டு வருகின்றன. இதனால் தமிழகத்தின் இந்த அறிவிப்பு ஒரு புதிய முன்னுதாரணமாக மாறுமா என்ற கேள்வியும் எழுந்துள்ளது.

முன்னாள் ஆட்சிகளிலும் எம்.எல்.ஏ. சலுகைகள் விவாதிக்கப்பட்டுள்ளன! சட்டமன்ற உறுப்பினர்களின் ஊதியம் மற்றும் சலுகைகள் தொடர்பான விவாதம் தமிழக அரசியலில் புதிதல்ல. முன்னாள் முதலமைச்சர் கலைஞர் கருணாநிதி ஆட்சிக்காலத்திலும் எம்.எல்.ஏ.க்களின் ஊதிய உயர்வு குறித்து சட்டப்பேரவையில் விவாதம் நடைபெற்றது. அதேபோல், ஜெயலலிதா ஆட்சிக்காலத்திலும் எம்.எல்.ஏ.க்களின் ஊதிய உயர்வு தொடர்பாக விவாதங்கள் எழுந்தன. அந்த விவாதங்களில், “மக்கள் நிதிநிலை சிரமத்தில் இருக்கும் நேரத்தில் மக்கள் பிரதிநிதிகளுக்கான சலுகைகள் அவசியமா?” என்ற கேள்வி அப்போதும் முன்வைக்கப்பட்டது.

அறிவிப்பு வெளியாகிவிட்டது… அடுத்த கட்டம் என்ன? தற்போது முக்கியமாக எழுந்துள்ள கேள்வி, இந்த கார் திட்டம் எந்த நடைமுறையில் செயல்படுத்தப்படும் என்பதுதான். எந்த வகை கார்கள் வாங்கப்படும்? ஒரே நிறுவனத்திடமிருந்து வாங்கப்படுமா? டெண்டர் விடப்படுமா? கார் யார் பெயரில் இருக்கும்? பராமரிப்பு எப்படி மேற்கொள்ளப்படும்? பதவிக்காலம் முடிந்ததும் வாகனம் என்ன ஆகும்? என்பன போன்ற விவரங்களுக்கு அரசு விளக்கம் அளிக்க வேண்டிய சூழல் உருவாகியுள்ளது.

ஒருபுறம், “மக்கள் பிரதிநிதிகள் தங்கள் தொகுதிகளில் வேகமாகச் சென்று மக்களின் பிரச்சினைகளை கவனிக்க வாகனம் அவசியம்” என்ற ஆதரவு கருத்து உள்ளது. மறுபுறம், “மக்கள் பணத்தில் முதலில் எதைச் செய்ய வேண்டும் என்பதில் முன்னுரிமை தேவை” என்ற விமர்சனமும் முன்வைக்கப்படுகிறது. இதனால், முதலமைச்சர் விஜய்யின் ‘எம்.எல்.ஏ.க்களுக்கு கார்’ அறிவிப்பு, ஒரு சாதாரண போக்குவரத்து வசதி குறித்த அறிவிப்பாக மட்டுமல்லாமல், அரசு நிதி, மக்கள் நல முன்னுரிமை மற்றும் அரசியல் நிர்வாகத்தின் வெளிப்படைத்தன்மை குறித்து பல புதிய கேள்விகளை எழுப்பியுள்ள விவகாரமாக மாறியுள்ளது.