தமிழக சட்டப்பேரவையில் இன்று நடந்த விவாதம், ‘ஜோசியக்காரர்’, ‘மஞ்சள் துண்டு’, ‘பஞ்ச் டயலாக்’ ஆகிய வார்த்தைகளால் பரபரப்பானது. எதிர்க்கட்சித் தலைவர் உதயநிதி ஸ்டாலின் எழுப்பிய கேள்விக்கு அமைச்சர் அளித்த பதில், அதனைத் தொடர்ந்து இருதரப்பினரும் முன்வைத்த கருத்துகள் என அவையில் அடுத்தடுத்து சலசலப்பு ஏற்பட்டது. முதலமைச்சர் அலுவலகத்தில் இருப்பதாக கூறப்பட்ட 3 கோப்புகள் தொடர்பான விவகாரமே இந்த விவாதத்திற்கு முக்கிய காரணமாக அமைந்தது.

“ஜோசியக்காரர் சொன்னால்தான் ஃபைலை திறப்பீர்களா?” சட்டப்பேரவையில் பேசிய எதிர்க்கட்சித் தலைவர் உதயநிதி ஸ்டாலின், முதலமைச்சர் தனது அலுவலக மேசையில் 3 கோப்புகள் இருப்பதாக கூறியதை சுட்டிக்காட்டி கேள்வி எழுப்பினார். “அந்த 3 ஃபைல்களையும் ஜோசியக்காரர் சொன்னால்தான் திறந்து பார்ப்பீர்களா? நல்ல நேரம் ஏதாவது பார்த்துக் கொண்டிருக்கிறீர்களா?” என அவர் கேள்வி எழுப்பினார். இந்தக் கருத்து அவையில் உடனடியாக கவனத்தை ஈர்த்தது.

“மஞ்சள் துண்டு போட்டதையெல்லாம் தமிழகம் பார்த்துவிட்டது!” இதற்கு பதிலளித்த சட்டத்துறை அமைச்சர் சி.டி.ஆர். நிர்மல் குமார், உதயநிதி ஸ்டாலின் பயன்படுத்திய ‘ஜோசியம்’ என்ற வார்த்தையை சுட்டிக்காட்டி பதிலளித்தார். “ஜோசியம் பார்த்து மஞ்சள் துண்டு போட்டதையெல்லாம் தமிழகம் பார்த்துவிட்டது” என அவர் கூறினார். மேலும், அரசு எந்த நடவடிக்கையை மேற்கொண்டாலும் வெளிப்படையாகவும், எந்தவித ஒளிவுமறைவும் இல்லாமலும் மேற்கொள்ளும் என்று தெரிவித்த அமைச்சர், எந்த நேரத்தில் சட்டப்பூர்வமான நடவடிக்கை எடுக்க வேண்டுமோ, அப்போது நடவடிக்கை எடுக்கப்படும் என்றும் கூறினார்.

“ஜோசியக்காரர் என்பது தவறான வார்த்தையா?” அமைச்சரின் பதிலுக்கு மீண்டும் பதிலளித்த உதயநிதி ஸ்டாலின், ‘ஜோசியக்காரர்’ என்ற வார்த்தையை பயன்படுத்தியது தவறில்லை என வாதிட்டார். “நாங்கள் ஒரு கேள்வி கேட்டால், நாங்களே ஆச்சரியப்படும் அளவிற்கு பதில் சொல்கிறீர்கள் என்று சொன்னேன். ஜோசியக்காரர் என்று பேசுவது தவறு என்கிறீர்கள். ஆனால் நீங்களே ஜோசியக்காரரைப் பணியமர்த்திவிட்டு பின்னர் நீக்கியிருக்கிறீர்கள்” என அவர் தெரிவித்தார். மேலும், கேள்வி நேரத்தையே நடத்த முடியாத நிலையில் இந்த அரசு செயல்பட்டு வருவதாகவும் உதயநிதி ஸ்டாலின் குற்றம்சாட்டினார்.

குறுக்கிட்ட பேரவைத் தலைவர் உதயநிதி ஸ்டாலினின் இந்தக் கருத்துக்கு பேரவைத் தலைவர் உடனடியாக குறுக்கிட்டார். “கேள்வி நேரத்தை நடத்த முடியாத நிலையில் இந்த அரசு இருக்கிறது என்பதை ஏற்றுக்கொள்ள முடியாது” என்று தெரிவித்த பேரவைத் தலைவர், நேரமின்மை இருந்தாலும் உறுப்பினர்கள் விதி 55-ன் கீழ் அளித்துள்ள தீர்மானங்களை கேள்விகளாகக் கேட்டு, அதற்கு பதில்களைப் பெறும் நடைமுறை தொடர்ந்து பின்பற்றப்பட்டு வருவதாக விளக்கம் அளித்தார். காலதாமதம் ஏற்பட்டாலும் கேள்விகளுக்கான பதில்கள் வழங்கப்பட்டு வருவதாகவும் அவர் தெரிவித்தார்.“அவைக்குறிப்பில் இருந்து நீக்கிக்கொண்டே இருக்கிறீர்கள்!” தொடர்ந்து பேசிய உதயநிதி ஸ்டாலின், சட்டப்பேரவை நிகழ்வுகள் நேரலை செய்யப்படுவது தொடர்பாகவும் தனது கருத்தை முன்வைத்தார். “சட்டமன்ற வரலாற்றில் முதல்முறையாக நேரலை செய்தது திராவிட மாடல் அரசு” என்று குறிப்பிட்ட அவர், கேள்வி நேரத்திற்கு தினமும் ஒரு மணி நேரம் ஒதுக்கப்பட்டு, 10 கேள்விகள் எடுத்துக்கொள்ளப்பட்டதாகவும், எதிர்க்கட்சித் தலைவர்கள் அனைவருக்கும் வாய்ப்பு வழங்கப்பட்டதாகவும் தெரிவித்தார். மேலும், சட்டப்பேரவையில் பேசப்படும் சில கருத்துகள் அவைக்குறிப்பிலிருந்து நீக்கப்பட்டாலும், அவை சமூக வலைதளங்களில் ரீல்ஸ்களாக மாறிவிடுவதாகவும் உதயநிதி குறிப்பிட்டார்.

“பகிரங்க சவால் விடுக்கிறேன்!” இதையடுத்து விவாதம் மீண்டும் முதலமைச்சர் அலுவலகத்தில் இருப்பதாக கூறப்படும் 3 கோப்புகள் பக்கம் திரும்பியது. “முதலமைச்சர் ‘மூன்று ஃபைல்கள் உள்ளன’ என்று சொன்னாரே. அதை நான் சாதாரண சவாலாக சொல்லவில்லை; பகிரங்க சவாலாகவே விடுக்கிறேன்” என உதயநிதி ஸ்டாலின் தெரிவித்தார். மேலும், முதலமைச்சர் அந்த கோப்புகளை தொடர்ந்து பார்வையிடலாம் என்றும், அதில் உண்மையான குற்றச்சாட்டுகள் ஆதாரத்துடன் இருந்தால் சட்டப்படி நடவடிக்கை எடுக்கலாம் என்றும் அவர் கூறினார்.“சினிமாவில் பஞ்ச் டயலாக் பேசுவது போல் சட்டமன்றத்தில் பேசக்கூடாது!” விவாதத்தின் இறுதியில் உதயநிதி ஸ்டாலின் கூறிய ஒரு வார்த்தை மீண்டும் அவையில் சலசலப்பை ஏற்படுத்தியது. “சினிமாவில் பஞ்ச் டயலாக் பேசுவது போல் சட்டமன்றத்தில் பேசக்கூடாது” என அவர் தெரிவித்தார். இதற்கு தவெக தரப்பில் கடும் எதிர்ப்பு எழுந்ததாக கூறப்படுகிறது.“பஞ்ச் டயலாக்” வார்த்தை அவைக்குறிப்பில் இருந்து நீக்கம்! இதனைத் தொடர்ந்து விவாதத்தில் தலையிட்ட பேரவைத் தலைவர், “பஞ்ச் டயலாக் என்ற வார்த்தையை அவைக்குறிப்பில் இருந்து நீக்குகிறேன்” என அறிவித்தார். இதனால் சட்டப்பேரவையில் நடந்த விவாதம் மேலும் கவனம் பெற்றது.

3 கோப்புகள் முதல் ‘பஞ்ச் டயலாக்’ வரை… முதலமைச்சர் அலுவலகத்தில் இருப்பதாக கூறப்பட்ட 3 கோப்புகள் தொடர்பான கேள்வியில் தொடங்கிய விவாதம், ஜோசியம், மஞ்சள் துண்டு, அரசின் செயல்பாடு, சட்டப்பேரவை கேள்வி நேரம், ரீல்ஸ் மற்றும் ‘பஞ்ச் டயலாக்’ என அடுத்தடுத்த சர்ச்சைக்குரிய வார்த்தைகளுக்கு சென்றது. இறுதியில், ‘பஞ்ச் டயலாக்’ என்ற வார்த்தையே அவைக்குறிப்பில் இருந்து நீக்கப்பட்ட நிலையில், சட்டப்பேரவையில் நடைபெற்ற இந்த விவாதம் அரசியல் வட்டாரத்தில் தற்போது பேசுபொருளாகியுள்ளது.